ඔබේ දරුවාට රත කල්කය ලබා දිය යුත්තේ ඇයි ?

කාන්තාවන් තම ජීවිතයේ ලබන උතුම් ම දායාදය වන්නේ, මව් පදවියයි. ඇය අංග සම්පූර්ණ ගැහැනියක වන්නේ මවක වීමත් සමඟයි. ඇගේ ශරීරයේ සම්පූර්ණ ඉන්ද්‍රියය ක්‍රියාකාරිත්වය සිදුවන්නේ එවිටයි. දරුවන් ලබන්න පිං කරන්න ඕනා. තත්ත්වය, තරාතිරම, ආර්ථිකය හා සමාජ මට්ටම කුමක් වුවත් බොහෝ කාන්තාවන් විවාහ වූ විගස ම වාගේ දරුවන් හදනවා. ඒක ඉතාමත්ම බුද්ධිත් තීරණයක්. කිසිදු පාලනයකින් තොරව එම ක්‍රියාවලිය ඉබේම සිදුවීමට ඉඩ දිය යුතුයි. ලැබෙන වෙලාවට තමයි දරුවන් ලැබෙන්නේ. ඒක තමයි හොඳම කාලය. ඒක කරදරයක් කියලා කිසිම කාන්තාවකට හිතන්නවත් අයිතියක් නැහැ. දරුවන් හැදෙන්නේ, වැඩෙන්නේ දෙමාපියන්ගේ ඇඟේ එල්ලීගෙනයි.

අපේ පැරණි සමාජයේ කාන්තාවක ගැබිනියක වීම ඉතා සුභ ආරංචියක්. එය අහල ගං හතකට ප්‍රචාරය වුණා. ඒ ගමේ දුර නෑයන් පවා ගැබිනිය බලන්න මේ ගමට නෑ ගමන් ආවා. ගැබිනියක වූ දින සිට එම කාන්තාව සියල්ලන්ගේම විශේෂ ගෞරවයට හා ආදරයට ලක්වුණා. පවුලේ බාලයන්, වැඩිහිටියන් සියල්ලන් ම ඇයට සැලකුම් දැක්වූවා. එක ජීවිතයක් නෙමෙයි. ජීවිත දෙකක්නේ. වැඩිහිටියන් විසින් මවගේ හා දරුවාගේ නිරෝගී බව කෙරෙහි විශේෂ අවධානය යොමු කරනු ලැබුවා.

බිලිඳාගේ දිවේ හා උගුරේ මැලියම් බැඳුණුවිට, බඩගිනි වීමට, බඩ පිපුමට, ඉස්මුරුත්තාවට, බඩඑළියේ නොයා තරමක් වියළිව යන විට, බඩගින්නක් නොමැතිව අඬනවිට, කැස්සට, සෙමට, මව් කිරට අඩු නොවන උණ ගතියට ඇතුළු ව ‘රතගාය’ නමින් හඳුන්වන රෝග කාණ්ඩයට අයත් ඇඟ රතුවීම, රතු පළු ඇතිවීම, ඇස් රතුවීම ආදී රෝග සඳහා දිව ඔසුවක් වූ ඖෂධ මවටත් දරුවාටත් ලබා දුන්නා. මේ සඳහා ඖෂධ වර්ග විශාල ප්‍රමාණයක් යොදා ගන්නත් ඉතා ප්‍රචලිත වූ සහ ජනපි‍්‍රය ඖෂධ වර්ග වූයේ රත කල්කයයි. එය නීරෝගිමත්, ශක්තිමත්, බුද්ධිමත් දරු පරපුරක් බිහිකරවීමට ආයුර්වේදය හරහා අපට උරුම වුණු දායාදයක්.

ලංකාවේ නොයෙක් ප්‍රදේශවල වෛද්‍යවරුන් අනුව රත කල්කය විවිධ නම්වලින් හඳුන්වනවා. දෙසදුන් කල්කය, රත්හඳුන් කල්කය, ළදරු කල්කය, බිලිඳු කල්කය හා කොත්තමල්ලි කල්කය යනාදී වශයෙන්. ආයුර්වේදයේ ගුලි හා කල්ක පිළිබඳ කවියෙන් විස්තර සඳහන් වන වටිකප්‍රකරණයේ රත කල්කය සම්බන්ධව මෙසේ දැක්වෙනවා.

කරාබු නැටි, වසාවාසි, සාදික්කා, කුරුඳු පොතු, සූදුරු, කළුදුරු, අරළු, නෙල්ලි, ඉගිනි ඇට, වැල්මී, අසමෝදගම්, වාසක්කා, රතුළූනු, සුදුළූනු, සුදුහඳුන්, රත්හඳුන්, ඉරමුසු, සාරණ, සිවන්ගුරු, වියළි රත්මල්, වියළි වදමල්, අක්කර පට්ටා, නාමල් රේණු, සැවැන්දන මුල්, වාල් මොලඟු, වැල් මදට, යවකාර ලුණු, සහිඳ ලුණු, සුවස ලුණු, වදකහ, ජයපාල ඇට සංයෝග කර කුඩුකර ගිතෙලින් අඹරා නැවත දෙහි ඇඹුලෙන් ද අඹරා රත කල්කය සකස්කර ගනී.

මෙම ඖෂධ වර්ග අනුව බැලුවහොත් එමඟින් දරුවාගේ බඩගිනි වඩවීම, දැවිල්ල හා උණුසුම අඩුකරවීම, සෙම් පිත් රෝග සමනය, දාහය සමනය, විෂබීජ නැසීම, අජීර්ණය සමනය, රෝග සෑදීම පාලනය හා ප්‍රතිශක්තිකරණ හැකියාව වර්ධනය කිරීම ආදිය ද සිදුකරනවා. ඉතා පිරිසිදුව සකස් කරගන්නා රත කල්කය බිළිඳු සිරුරේ ව්‍යාධි ක්ෂමත්වය ඇති කරන බව ආයුර්වේද මතයයි. එබැවින් බිලිඳුන් සිටි සෑම නිවසක ම එදා රත කල්කය අනිවාර්යය ඖෂධයක් වී තිබුණා.

එදා රත කල්කය බිවූ බිලිඳුන් අද වැඩිහිටියන්. ඒත් ඔවුන් තමන්ගේ දරුවන්ට රත කල්කය දුන්නාද සැකයි. එයට හේතුව මීට දශක දෙක තුනකට පමණ අතීතයේදී රත කල්කයට එරෙහිව විවිධ මත සමාජගත වීමයි. බටහිර වෛද්‍ය ක්‍රමයේ ප්‍රතිශක්තිකරණ එන්නත බිලිඳුන්ට අනිවාර්යයෙන් ලබා දීමට සමගාමී ව රත කල්කය ක්‍රමයෙන් බැහැර කරන්නට යෙදුනා. ඒ වන විට රත කල්කයේ විද්‍යාත්මක බව සනාථ කොට නොතිබීමත් ඊට එක් හේතුවක්.

එබැවින් දෙමාපියන් තම දරුවන්ට රත කල්කය ලබාදීම අමතක කර දැමුවා. නැත්නම් ඊට තරමක චකිතයක් හෝ මැලිකමක් දැක්වූවා. පළපුරුද්දෙන් හා දැක පුරුද්දෙන් රත කල්කයේ ඇති රෝග නැසීමේ හා ප්‍රතිශක්තිය ඇතිකිරීමේ ගුණය හඳුනාගත් අපේ පැරණි වෙද පරම්පරාවල දැනුම අද සමාජයට ගලපා ගත යුතු වුණා. සැබැවින් ම එය සිදුවිය යුත්තක්.

මෑත කාලයේදී පැවත්වුණු ශ්‍රී ලංකා විද්‍යාභිවර්ධන සංගමයේ වාර්ෂික සමුළු කිහිපයකදී ම රත කල්කයේ ගුණාත්ක බව හා යෝග්‍යතාවය පිළිබඳ සිදුකරන ලද පර්යේෂණ නිබන්ධන ඉදිරිපත් වුණා. මෙහිදී මහාචාර්ය ගුණපාල අමරසිංහ මහතා විසින් සිදුකරන ලද පර්යේෂණයන් විශේෂයෙන් සඳහන් කළ යුතුයි. එබැවින් තවදුරටත් රත කල්කයට එරෙහි මත වෙනුවෙන් ඉඩක් ඇත්තේ නැහැ. තවදුරටත් තම බිලිඳන්ට රත කල්කය ලබාදීම පිළිබඳව කිසිවකු හෝ බියක් ඇතිකරගත යුතු වන්නේ නැහැ.

වර්තමානයේදී නැවතත් රත කල්කය පිළිබඳව සමාජයේ උනන්දුවක් ඇතිවී තිබීම සතුටට කරුණක්. බටහිර හෝ ආයුර්වේද වශයෙන් බෙදීම අවශ්‍ය වන්නේ නැහැ. සිදුකළ යුත්තේ වඩාත් සුදුසු ක්‍රමවේදය අනුගමනය කිරීමයි. අප වෙත පැමිණෙන තරුණ වයසේ දෙමාපියන් තම බිලිඳු දරුවාට අවශ්‍ය රත කල්කය ලබා ගන්නවා. නිරෝගී දරු පරපුරක් බිහිවීම වෙනුවෙන් රත කල්කයෙන් ලැබෙන පිටිවහල ඉතා විශාලයි.

නමුත් විශේෂයෙන් සඳහන් කළ යුත්තේ රත කල්කය ලබා දීමේදී එය වෛද්‍ය උපදෙස් මත පමණක් සිදුකළ යුතු බවයි. සමහර වැඩිහිටියන් පවසන පරිදි හා ඔවුන් තමන්ගේ බාල කාලයේ ලබාගත් පරිදි කොත්තමල්ලි ඇටයක, දෙකක ප්‍රමාණය, මදටිය ඇටයක ප්‍රමාණය යන මිනුම් දඬු අදට වලංගු වන්නේ නැහැ. බිලිඳාගේ හෝ දරුවාගේ වයස, ශරීර ස්වභාවය අනුව නියමිත මාත්‍රාව තීරණය කළ හැක්කේ වෛද්‍යවරයාටයි. රත කල්කය ලබාදීම මෙන්ම ලබා නොදීම පිළිබඳව ද දරවා පරීක්ෂා කිරීමෙන් පසු වෛද්‍යවරයා තීරණය කරනවා.

උපත් බර අඩු දරුවන්ට, නොමේරූ දරුවන්ට, දිගු කාලීන රෝග පීඩාවන්ට ගොදුරු වූ දරුවන්ට, නිතර නිතර බඩ බුරුලට යන දරුවන්ට සාමාන්‍යයෙන් රත කල්කය ලබා දෙන්නේ නැහැ. තමන්ගේ හිතු මනාපයට රත කල්කය ලබාදීම මෙන්ම ප්‍රමිතියෙන් තොරව නිපදවා ඇති රත කල්ක නිෂ්පාදන ලබාගැනීම යන දෙකම නොකළ යුතුයි. වෛද්‍ය උපදෙස් මත අවශ්‍ය රත කල්ක ප්‍රමාණය ගෙන මව් කිරෙන් දියකර එය බිලිඳාට ලබාදිය හැකියි. මව්කිරි වෙනුවට කොත්තමල්ලි තැම්බූ වතුර මෙන්ම පත්පාඩගම් තැම්බූ වතුර ද යොදාගත හැකියි.

දරුවකු උපන් දා පටන් රෝග පීඩාදියෙන් තොරව නිරෝගී වර්ධනය කෙරෙහි නිරතුරුව උනන්දු වූ එදා මාපියන් දැනුවත් බවින් යුතුව නිසි වෙලාවට රත කල්කයේ පිහිට ලබා ගත්තා. රත කල්කයේ ගුණය හා වටිනාකම අදටත් එලෙසටමයි. බටහිර වෛද්‍ය ක්‍රමයේ ප්‍රතිශක්තිකරණ එන්නත් නියමිත කාලයට ලබා දෙනවා මෙන්ම අවශ්‍ය විටදී රත කල්කය ද ලබාදිය යුතුයි. බිලිඳු සිරුරේ ව්‍යාධි ක්ෂමත්වය ඇති කිරීමට රත කල්කය හේතු බව ආයුර්වේද මතය බව ඉතා පැහැදිලිව ම සඳහන් කළ යුතුයි. හොඳ දේ කොතැනින් ගත්තත් හොඳයි.

රත කල්කය දෙන්නේ කොහොමද? – මෙහෙම මෙහි සදහන් කලාට වෛද්‍ය උපදෙස් නොමැතිව දෙන්න එපා. දෙන විදිය සදහන් කරන්නේ වෛද්‍යවරයාය. මෙය ඔබේ දැනුවත් භාවයට.

කොත්තමල්ලි ඇටයක්‌ තරම් ස්‌වල්ප ප්‍රමාණයක්‌ මව් කිරෙන් දියකර ලබා දෙන්න.

කොත්තමල්ලි ඇට 10 ක්‌ පමණ කබලේ බැද තම්බාගත් වතුරට, රත්මල් තම්බාගත් වතුර කලවම් කර, රත කල්කයෙන් කොත්තමල්ලි ඇටයක්‌ තරම එයට දිය කර පොවන්න.

මී පැණි ස්‌වල්පයකට කලවම් කර දෙන්න

දරුවාට පිටි කිරි ලබාදෙනවා නම් එම කිරි ස්‌වල්පයකට කලවම් කරදෙන්න.

මේ ඕනෑම වර්ගයක්‌ සමඟ දිනකට වරක්‌ හෝ දෙවරක්‌ රත කල්කය ලබා දෙන්න පුළුවන්. ඒ වගේම උපතින් සතියකට පමණ පසුව රත කල්කය දීම ආරම්භ කරන්න පුළුවන්. මෙය සතියක්‌ හෝ දෙකක්‌ දිගටම ලබා දීම ප්‍රමාණවත්.

අප ඖෂධ ලබාදෙන්නේ රෝග තත්ත්වයන් සඳහායි. නමුත් රත කල්කය ලබාදෙන්නේ රෝග තත්ත්වයන් ඇති නොවීමට, ශරීරයේ ප්‍රතිශක්‌තිය ඇති කිරීම සඳහායි. බරණැස හින්දු විශ්ව විද්‍යාලයේ කළ පර්යේෂණයකදී පවා, රත කල්කය මගින් ළදරුවාගේ ශරීරයේ ප්‍රතිශක්‌තිය වැඩි කරන බව ඔප්පු වී තිබෙනවා.

දෙමාපිය, වැඩිහිටියන්ට අපි කියන්න ඕන මේ රත කල්කය ගැන බයක්‌ ඇති කරගන්න එපා. ඇතැම් විට බටහිර වෛද්‍යවරු හා සෞඛ්‍ය සේවිකාවෝ කියනවා මේ රත කල්කය දෙන්න එපා කියලා. නමුත් මේ වෛද්‍යවරුන්ට පවා කුඩා කාලයේදි ඔවුන්ගේ මව්වරු රත කල්කය ලබාදීලා ඇති

රත කල්කය ලබාදීමෙන්

සමේ රෝග තත්ත්වයන්ගෙන් දරුවා ආරක්‌ෂා වේ
ආහාර දිරවීම හොඳින් සිදුවේ.
කිරි උරාබීම හොඳින් සිදුකරයි.
අජීර්ණ, බඩ එළිය යාමේ රෝග ඇති නොවේ
මළ , මුත්‍ර හොඳින් පිට වේ.
ශරීරයේ ලේ පිරිසිදු වේ

ළදරුවාට ලබා දෙන සෑම දෙයක්‌ම ඉතාම පිරිසිදුව ලබාදිය යුතුයි. ඒ ලෙසින්ම රත කල්කයද ඉතාම පිරිසිදුව පිළියෙල කර ලබා දීම දෙමාපියන්ගේ වගකීමයි.

වෛද්‍ය සජානි වාසනා ප්‍රනාන්දු

Add Comment